കൊച്ചി ∙ അനധികൃത സ്വത്ത് സമ്പാദനക്കേസിൽ ശിക്ഷിക്കപ്പെട്ട മുൻ ഡിജിപി ടോമിൻ ജെ. തച്ചങ്കരി ഒരു ദിവസം പോലും ജയിൽ സെല്ലിൽ കഴിയാതിരിക്കാൻ ഗൂഢാലോചന നടന്നിട്ടുണ്ടോയെന്ന് കേരള ഹൈക്കോടതി വാക്കാൽ സംശയം പ്രകടിപ്പിച്ചു. വിദേശത്തേക്ക് പോയി ജോലിയിൽ തിരികെ പ്രവേശിക്കാൻ അനുമതി തേടി തച്ചങ്കരി നൽകിയ ഹർജി പരിഗണിക്കവേയാണ് ജസ്റ്റിസ് എ. ബദറുദ്ദീന്റെ പരാമർശം. ഹർജിയിൽ കോടതി വിധി പറയാൻ മാറ്റി.
‘‘അദ്ദേഹം ജയിൽ സെൽ പോലും കണ്ടിട്ടില്ല. ഡിജിപിയായിരിക്കെ പരിശോധനയ്ക്ക് ചെന്നപ്പോൾ കണ്ടിട്ടുണ്ടാകാം,’’ കോടതി വാക്കാൽ പരാമർശിച്ചു. രോഗം കാരണമാണോ തച്ചങ്കരിയെ ജയിൽ ആശുപത്രിയിൽ പ്രവേശിപ്പിച്ചതെന്നും അതിൽ ജയിൽ ഡോക്ടർമാർക്കോ ജയിൽ സൂപ്രണ്ടിനോ മറ്റ് ഉദ്യോഗസ്ഥർക്കോ പങ്കുണ്ടോയെന്നും അന്വേഷിക്കേണ്ടിവരുമെന്ന് കോടതി പറഞ്ഞു.
നവംബർ 12ന് ഹർജി പരിഗണിച്ചപ്പോൾ, വിദേശയാത്രയ്ക്ക് അനുമതി തേടിയ അപേക്ഷ പിൻവലിക്കാൻ തച്ചങ്കരി അനുവാദം തേടി. എന്നാൽ അപേക്ഷ പിൻവലിച്ചാലും അദ്ദേഹത്തിന്റെ ആരോഗ്യസ്ഥിതി വിലയിരുത്താൻ മെഡിക്കൽ ബോർഡ് പരിശോധനയ്ക്ക് സ്വമേധയാ ഉത്തരവിടുന്ന കാര്യം പരിഗണിക്കുമെന്ന് കോടതി വാക്കാൽ വ്യക്തമാക്കി.
ശിക്ഷിക്കപ്പെട്ടതിനു ശേഷം ശിക്ഷ നടപ്പാക്കുന്നത് ഹൈക്കോടതി നിർത്തിവെക്കുന്നതുവരെയുള്ള കാലയളവിൽ തച്ചങ്കരി ഏതാണ്ട് ഒരു മാസം ആശുപത്രിയിൽ കഴിഞ്ഞതായി മുൻ വാദത്തിനിടെ കോടതി ചൂണ്ടിക്കാട്ടിയിരുന്നു. കസ്റ്റഡിയിലിരിക്കെ എത്ര ദിവസം ആശുപത്രിയിൽ കഴിഞ്ഞുവെന്ന് വ്യക്തമാക്കുന്ന റിപ്പോർട്ടും ജയിൽ സൂപ്രണ്ടിൽനിന്ന് കോടതി തേടിയിരുന്നു. റിപ്പോർട്ട് ലഭിച്ചതിനുശേഷം, ആശുപത്രിവാസം ചികിത്സയ്ക്ക് ആവശ്യമായിരുന്നോ അതോ ജയിൽ സെല്ലിൽ കഴിയുന്നത് ഒഴിവാക്കാനുള്ള നീക്കമായിരുന്നോ എന്നത് വിശദമായി പരിശോധിക്കേണ്ടതുണ്ടെന്ന് കോടതി അഭിപ്രായപ്പെട്ടു.
അനധികൃത സ്വത്ത് സമ്പാദനക്കേസിൽ തച്ചങ്കരിക്ക് നാലു വർഷം തടവും 30.8 ലക്ഷം രൂപ പിഴയുമാണ് വിധിച്ചത്. ശിക്ഷ വിധിച്ച് നാലാഴ്ചയ്ക്കുശേഷം ഹൈക്കോടതി ശിക്ഷ നടപ്പാക്കുന്നത് നിർത്തിവെച്ച് ജാമ്യം അനുവദിച്ചു. ഇന്ത്യ വിട്ടുപോകരുതെന്ന ജാമ്യവ്യവസ്ഥയിൽ ഇളവ് തേടിയാണ് തച്ചങ്കരി ഹൈക്കോടതിയെ സമീപിച്ചത്.